CLICK HERE FOR THOUSANDS OF FREE BLOGGER TEMPLATES »

السبت، 17 مايو 2008

همسات بين العقل والروح

كلما مررت علي المدونات تعثرت في مدونة سيكون لها فرصة مثلي ليكون شيء منها بين طيات ذاك الكتاب ،وعندما أقرأبعض منها أندهش وأتسائل كيف سيكون ذاك الكتاب
وأذداد توقا لأن أراه وأتصفحه
وأتسائل أيضا ما الذي كنت أملكه يوما ليجمعني بهؤلاء ؟
وأتسائل كيف ستكون كلماتي بينهم؟
وأذداد خجلا وزهوا وقلقا0

مدونات مصرية للجيب



إن شاء الله حفل توقيع العدد الأول من سلسلة مدونات مصرية للجيب

هايكون يوم الخميس 22/5/2008 الساعة 6,5 مساء

وسط البلد - ميدان التحرير-شارع طلعت حرب



عمر بوك ستور-فوق مطعم فلفلة


إن شاء الله أشوفكم هناك





(كل الشكر لكل القائمين علي العمل ولمن أعطاني الفرصة للمشاركة معهم)
لأى إستفسار

الأحد، 11 مايو 2008

سؤال

  • عندي سؤال ياريت تجاوبوني عليه بكل صراحة ومهما كان ردكم لا يمكن أزعل ،تفتكروا لو يعني لوكنت في يوم من الأيام منتقبة هل كلامي اللي بكتبه في المدونة بتاعتي دي هايعتبر وقتها غير لائق أو فيه تلميحات المفروض ماتتقلش من واحدة المفروض إنها ملتزمة أدام الناس كدة حتي لو كان متوجه لجوزها ،والناس اللى غاوية تهاجم النقاب هاتلاقيها فرصة كويسة أوي ،علشان يقولوا شوف يا سيدي المنتقبات بيكتبوا إيه ، هل كلامى ممكن يأذى حد ؟هل عداد الذنوب شغال وانا مش حاسة مع كل واحد بيدخل ويقرا كلام غزل زيه زى أى أغنية ،ولا أنا مكبرة الحكاية أوى وكلامى معظمه عقلانى مش رومانسي ،وإن ممكن جدا حد يستفيد من الكلام دة ،اقسملكوا بالله إن انا غرضى من المدونة دي قبل ماعملها هوة محاولة إن أي زوجة ممكن تقرا كلامى تتأثر بيه وتفهم جوزها كويس وتعامله كويس ،وإني أكتب كلام يفضل أدام عيني علي طول أفكر بيه نفسى قبل أي حد لما أكون زعلانة من جوزي ،أنا قبل ماعمل المدونة دي ماكنتش زي مانتم متخيلينى كدة ،كنت زى أي زوجة نكدية بكبر بنفسي أي مشكلة صغيرة ممكن تعدي ونعد باليومين متخاصمين مابنكلمش بعض والا كلمة واحدة ،لأ دة كان العادي إننا نكون متخاصمين وأحيانا نكون متصالحين ولأني لا يمكن أقدر أحكي مشاكلي لحد مهما كنت بحبه وبيحبني جدا كنت بشكي لربنا وبحاول أعقل نفسي بالكلام اللى بكتبه دلوقتي دة واللي كان بيتبخر وقت الخلاف ،كنت بعقل نفسي لأني كنت ببقي خلاص وصلت لفكرة الطلاق ،بصراحة فكرة الطلاق كانت أقرب حل الشيطان بيلحقني بيه علشان طبعا ينجح ويبقي أقربهم منزلة (قال النبي صلي الله عليه وسلم :إن إبليس يضع عرشه علي الماء ثم يبعث سراياه ،فاقربهم منه منزلة أعظمه فتنة ،يجيء أحدهم فيقول فعلت كذا وكذا ،فيقول ماصنعت شيئا ،ثم يجيء أحدهم فيقول ماتركته حتي فرقت بينه وبين أمرأته قال: فيدنيه منه ويقول : نعم أنت رواه البخاري)الحديث دة كان الحاجة الوحيدة اللي بتخليني أتراجع ،أنا كنت بحب جوزي والله بس الحب دة كان بيتنسى مع أي مشكلة صغيرة ،دلوقتي وبعد مالكلام دة بقي أدام عيني على طول وأدامكم ،بقيت أسعد في حياتي وماعدش فيه خصام أطول مدة خصام بتكون عادة خمس دقايق وصوت ضحكنا بقي بيعلي ،لأوكمان هايتنشرلي قريب في سلسلة مدونات مصرية للجيب (أنا مش مصدقة بس خدت وعد )وبقي فيه ناس بتحبني ونفسها تتكلم معاية وانا كمان نفسي أتكلم معاهم (حبيبه)،إيه اللي فكرني بالكلام دة ؟ اللي فكرني إن في إنسانة بحبها جدا وملاهاش علاقة خالص بالمدونات قلتلي :أنا معترضة على فكرة إنك تكتبي كلام زي دة والناس تقراه (علشان فيه حب وتغزل )،قولتلها : بس أنا صليت صلاة إستخارة قبل ماعمل المدونة ورغم إني حتي مابعرفش أعمل إيميل ربنا يسر وقدرت أعملها وبقت علاقتي كمان كويسة أوي مع جوزي أكتر من الأول وكمان جيت فترة زهقت من المدونة لأنى مابحبش أعد على الكمبيوتر كتير ونويت أقفلها وبعد حوالي أسبوعين من التردد وعدم فتح الكمبيوتر خالص فتحت الإيميل وفوجئت إن فى فرصة لبعض كلامى إنه يتنشر ،مش ممكن تكون كل الحاجات دى توفيق من عند ربنا ولأ إنتي صح وكملي فاقلتلي : طب ما يمكن (ولا يحسبن الذين كفروا انما نملى لهم خير لانفسهم انما نملى لهم ليزدادوا اثما ولهم عذاب مهين) ...آل عمران الآية 198 صعقتني طبعا الآية وقلتلها:طب ليه ماتقوليش ( من عمل صالحاً من ذكر أو أنثى وهو مؤمن فلنحيينه حياة طيبة ولنجزينهم أجرهم بأحسن ما كانوا يعملون ) النحل /97 . ،فاقلتلي: إنتي شايفاه عمل صالح ،وانتهي النقاش وانا مش فاهمة الصح فين ،معقولة كل الحاجات الكويسة اللي حصلتلي دى في فترة اقصر مما أتوقع مش أكتر من إني غلطانة اوي وربنا سبحانه وتعالي يملى إليه ،معقولة؟محتاجة جدا لرأيكم ،والله أنا دلوقتي بعيط لأني خايفة أوي أكون بعمل حاجة ربنا هايحاسبنى عليها0وانا مش آخدة بالي 0 إستدراك/ أختي الغالية الؤلؤة المكنونة كانت أهدتني تاج ،المفروض إني أقول عشر حاجات عن نفسي ،ياريت يا لؤلؤة تعتبري الكلام اللى فات دة كافي ،فيه عني أكتر بكتير من عشر حاجات ،انا كنت ناوية أكتب حاجات من اللى ممكن تكونى عايزة تعرفيها لكن ماحبتش أتأخر عليكي أكتر من كدة ،وسامحيني لأني بجد متضايقة أوي ومش عارفة أكتب حاجة ،ولو عايزانى أهدى التاج لخمس أشخاص هاهديه لأول خمسة يقولولى رأيهم فى الحيرة دى بجد 0